De vereiniging Veldeke Limburg besjteit op ’t ougenblik oet 11 krènge.
De Veldeke krènk Zitterd is hie eine van.
Jeder jaor organizeiert de krènk Zitterd ein aantal aktiviteite. Ó.a. eine declamasie aovend of – middig, ein Zittesje Mès, ein excursie en eine Krismiddig. Bie dees aktiviteite sjteit ’t Zittesj ummer centraal. Ouch geef de Veldeke krènk Zitterd óm de zös maondj eine periodiek oet: “Dao wo ich gebaore bèn”. Hienaeve versjiene ad hoc publicaties die in ’t Zittesj zeen gesjreve. Saer 2013 wurt ouch ’t Zittesj Krisdictee georganiseiert.
Historie
In ’t begin van de 20e eeuw maakte ’n aantal bekènde Limburgers zich zörg euver de dialekte van ós provincie. Ze ware bang tot die zowwe verdwiene door d’n invloud van ’t Holles. Ze richde de vereiniging Veldeke Limburg op, die tot doel haw (en nog ummer haet): Het behoud en de bevordering van de Limburgse dialecten.