’t ‘Zittesj ABC veur kènjer’, dat veer veurig jaor oetgegaeve höbbe en oetverkoch waar, is weier besjikbaar. Door de grote vraog hie haet höbbe veer besjlaote tot eine herdrök. Dit bouk is in eesjte instantie besjtömp is veur kènjer van de leger gróppe van de basissjool die natuurlik veurgelaeze zulle waere door greutsje (groot) awwesj die ’t Zittesj hoog hawte. Van alle lèttesj oet ’t alfabet sjtaon weurd in ’t bouk en van mènnigein sjteit ouch nog ein teikening óm dit woord te verdudelikke. Ouch kómme de klanke aan bod die veer in ’t Zittesj kènne.
Eine gróp Zitterder besjtaonde oet Piet Deeder, John Hertogh, Phil Schaeken en Patrick Werdens höbbe zich gebaoge euver de weurd die in dit bouk zeen opgenómme en Jan Ruigt is bereid gevónje óm ’t bouk te illustreiere mit zien teikeninge. Ein dergelik bouk besjteit nog neit in Zitterd en veer vónje ’t tied waere óm dit te realiseiere. ’t Is ein sjitterend bouk gewore dat neit maag óntbraeke in eure boukekas. En noe krieg geer ein tweede kans óm ’t bouk aan te sjaffe.
De herdök is te kriege bie boukhanjel Krings oppe Brandjsjtraot, Flow’s Boekensteun oppe Sjteivig, Speels oppe Pötsjtraot en bie de VVV oppe Rosmeulesjtraot. Pries is geliek gebleve aan €17,50