Nuuts

Home / Nuuts

046 Sjrif – veurinteikening muigelik

Op 1 december zal de 1e editie van ós nuuj publicatie 046 Sjrif versjiene, eine bundel mit werk van dialectsjrievesj oet ós gemeinte Zitterd-Gelaen-Bor.

Veur dees eesjte editie höbbe veer es thema ‘Vandaag d’n daag’ gekaoze. Houfredactäör van dees oetgaaf is burgemeister Sjraar Cox. Hae haet ein selectie gemaak oet ‘t ingezónje werk en haet daonaevebie ouch nog ’t veurwoord verzörg. Boete al dit gesjreve sjoons zeen veer d’r greutsj op dat veer Jan Ruigt bereid höbbe gevónje óm passende aafbeeldinge veur ós te verzörge.

Dialectsjrievesj die woonechtig of gebaore zeen in de gemeinte höbbe hun werk ingesjik. Ein versjeienheid aan verhaole, gedichte en leidtekste höbbe ós bereik. Van 24 sjrievers is werk (mit ein maximum van 2) opgenómme in ’t bouk. Waat betruf de sjpelling höbbe veer de sjrievers op ’t hart gedrök óm zich zoväöl muigelik te hawte aan de Sjpelling 2003 veur de Limburgse dialecte. Hie höbbe zie zich doorgaons goud aan gehawte en veer höbbe d’r veur gekaoze óm de tekste integraal op te numme.

’t Bouk zal bie de boukhanjel te koup zeen veur €12,50

Wilt geer ’t bouk aevel al bie veurinteikening besjtèlle dan betaald geer mer €10,- Geer mót eur besjtèlling veur 1 december e.k. doorgaeve via email aan: veldekezitterd@gmail.com en aangaeve wieväöl buik geer wilt besjtèlle. Taeves mót geer ’t versjöldigde bedraag euvermake nao raekening NL85 RABO 0187621454 Es ’t bedraag oppe raekening sjteit is de besjtèlling pas definitief. Nao 1 december kènne dees buik aafgehaold waere bie boukhanjel Krings oppe Brandjsjtraot.