Richtig Zittesj Pries 2020

Deze pries is door Veldeke en de Optochsjurie in ‘t laeve geroupe óm ‘t – correcte – gebroek van ‘t Zittesj dialec in de optochte te sjtimuleiere. Veldeke levert per dit jaor eine aafgevaerdigde veur de jury, dae sjpeciaal aandach geit sjènke aan ’t gebroek van de ‘meis richtig Zittesje titel’ en dat thema ouch mit ‘fien Zittesj sjpel’ wit oet te beelde. Degein dae dit ‘t bèste deit wint de Richtig Zittesj Pries 2020.

De te wènne pries is ein gesjtileierd metale silhouet van Zitterd. Deze pries is gesjónke door Vahsen Constructies en veer zeen hun hie bezunjer erkèntelik veur.

Vanoet Veldeke Zitterd vènje veer de vastelaovend eine belangrieke drager van ’t Zittesj dialec en gaeve veer gaer eine bliek van waardeiering aan al die optochdeilnummesj die de muite numme óm ’t Zittesj dialec laevend te hawte.

Es veurzitter van de Optochsjurie leet Astrid Verblakt weite dat zie gaer biedrage aan ’t sjtimuleiere van ’t Zittesj dialec in de optoch ómdat ’t dialec ónlosmakelik verbónje is mit de Zittesje vastelaovend.

Veer meine mit deze Richtig Zittesj Pries ein gouw brök te höbbe gesjlage tössje de Zittesje vastelaovend en ós sjoon modesjtaal.

De Grote Optoch is dit jaor neit doorgegange. Veer zulle ós same mit de Optochsjurie beraoë wie veer mit de Richtig Zittesj Pries 2020 ómgaon.

Geef een reactie

Het e-mailadres wordt niet gepubliceerd. Vereiste velden zijn gemarkeerd met *